Kongresisti amerikan Elliot Engel nga foltorja e Kuvendit të Kosovës u ka bërë thirrje edhe njëherë institucioneve të vendit që ta themelojnë vetë Gjykatën Speciale.
Engel, i cili mbajti një fjalë rasti në seancën solemne kushtuar Deklaratës Kushtetuese të 2 Korrikut të vitit 1990, ka thënë se nuk do të ishte mirë për Kosovën nëse Gjykata Speciale themelohet nga Këshilli i Sigurimit të OKB-së.
“Ka shumë zgjidhje të vështira që duhet të bëhen dhe njerëzit e Kosovës po i bëjnë ato. Siç e shoh unë zgjidhjen e kësaj situate nuk është e lehtë. A do të ketë Gjykatë Speciale apo asgjë? Për mua çështja është se a do të ketë Gjykatë Speciale nga Kosova apo Gjykatë nga Kombet e Bashkuara? Nëse nuk do të ketë Gjykatë Speciale, Kombet e Bashkuara do ta bëjnë një të tillë dhe nuk besoj se Kosova do të ketë mirë nëse kjo bëhet nga Kombet e Bashkuara. Besoj se Kosova në OKB ka shumë probleme. Kosova nuk është pjesë anëtare e kësaj organizate për shkak të bllokimit nga Serbia dhe Rusia”, ka deklaruar Engel.