Edhe vizita në Turqi e zëvendëskryeministrit dhe ministrit të Jashtëm, Hashim Thaçi, më shumë i ngjanë një vizite presidenciale, se ministrore.
Prej kur ia ka lënë postin e të parit të ekzekutivit partnerit të tij qeverisës, Thaçi të gjitha takimet bilaterale jashtë vendit i ka pasur me krerët kryesorë të shteteve.
Njëjtë si në vizitat e kaluara, Thaçi edhe në Turqi do të takohet së pari me ministrin e Jashtëm, Mevlyt Çavushollu.
Pas Çavushollus, do të takohet edhe me kryetarin e Parlamentit, Cemil Çiçekun dhe me presidentin e Turqisë, Rexhep Tajip Erdogan. Ndërkaq, të nesërmen do ta ketë një takim edhe me kryeministrin Ahmet Dautollu.
Zëvendëskryeministri Thaçi, do të vizitojë edhe Mauzoleun e Ataturkut në Ankara, si dhe do të marrë pjesë edhe në hapjen e një Qendre Kulturore Shqiptare. Ndërsa, për shtatë vjetorin e Pavarësisë së Kosovës, për Thaçin në Ankara do të organizohet edhe një pritje e veçantë. /Telegrafi/