Kryetari i Prizrenit Shaqir Totaj, së bashku me nënkryetarin Kujtim Gashi, drejtoreshën komunale të Arsimit, Luljeta Veselaj-Gutaj dhe përfaqësuesit e Policisë Rajonale të Prizrenit, Shërbimit të Zjarrfikësve si dhe QKMF-së, pritën sot zëvendësministrin e Ministrisë së Mbrojtjes, Shemsi Syla, i shoqëruar me anëtarët e grupit punues të kësaj ministrie për menaxhimin e fatkeqësive natyrore dhe fatkeqësive tjera, për të diskutuar rreth Planit Operativ Emergjent Lokal dhe gatishmërinë emergjente të Komunës së Prizrenit.
“Ngritja e aseteve teknike dhe atyre njerëzore, në bashkëpunim me të gjitha institucionet e sigurisë në vend, ishin ndër temat kryesore që i biseduan, duke pasur parasysh vlerësimin e rreziqeve dhe ushtrimin e skenarëve, që në rast nevoje, të parandalohen fatkeqësitë e të gjitha natyrave dhe të minimizohen pasojat, gjithmonë duke e vënë në rend të parë ruajtjen e jetës së qytetarëve”, njofton Komuna e Prizrenit.
