Malet e Sharrit bashkojnë komunat shqiptare në Kosovë, Maqedoni dhe Shqipëri. Ky projekt rajonal po gjen mbështetjen edhe të bashkësisë evropiane
Në Prizren janë takuar aktorët e grupeve të interesit për rajonin ndërkufitar “Sharri”, ku gravitojnë komunat nga Kosova, Shqipëria e Maqedonia. Po kështu u bë edhe prezantimi i draft-programit të dokumentit për zhvillim ekonomik të rajonit ndërkufitar të “Sharrit”.
Lidhur me këtë takim foli kryetari i Qarkut të Kukësit, Isben Elezi. “Sa i përket projektit të Sharrit mund të them se i përfshin disa nga komunat e Kukësit dhe ato që i takojnë maleve të Sharrit dhe këtu diskutohet për nevojat e përbashkëta”, tha ai, shkruan Kosova Sot.
Në emër të Komunës së Prizrenit foli nënkryetari i komunës, Ruzhdi Rexha. “Ky organizim ka si prioritet zhvillimin dhe mbrojtjen e maleve të Sharrit në pjesë e bujqësisë, kurse prioritet tjetër mbetut rruga Prizren-Tetovë”, tha Rexha, duke shtuar se pritet edhe hartimi i planit të fizibilitetit të maleve të Sharrit.
Isen Hasani, nga komuna e Tearcës në Maqedoni, pohoi se këtu përfaqëson rajonin e Pollogut, ku si prioritet janë ndërtimi i rrugëve dhe krijimi i deponive adekuate.
“Unë jam optimist se do të kalojmë në projekte konkrete, të cilat do të financohen nga BE-ja”, tha ai.
Bajram Ymeri, në emër të Ministrisë së Bujqësisë, tha se ministria do të mbështes këtë projekt.
Takimi i radhës pritet të organizohet në njërin nga këto tri shtete.