Zyrtarë të lartë të partive në pushtet shkojnë në fushatë zgjedhore me veturat e shtetit edhe pse është e ndaluar me një vendim qeveritar.
Partitë në pushtet; PDK, AKR dhe LDK-ja që drejton komunën e Prishtinës, edhe pse nuk kanë pranuar se i shfrytëzojnë veturat e shtetit nëpër fushata zgjedhore , drejtues të shoqërisë civile thonë se veturat zyrtare po keqpërdoren sidomos në kohë fushatash.
Se me çfarë veture shkon kreu i LDK-së, Isa Mustafa në fushatë, Vjosa Osmani shefe e Shtabit Zgjedhor të LDK-së, ka thënë për gazetën “Bota Sot”, se është një fakt që mund ta konfirmoni edhe ju si medie, se kryetari Mustafa, vazhdimisht jo vetëm nga fillimi i fushatës zgjedhore mirëpo edhe në aktivitetet e tjera partiake që kanë ndodhur para fillimit të fushatës gjithnjë shfrytëzon veturat e LDK-së apo edhe veturën e tij personale që nuk është pronë e komunës, tha Osmani.
Ndërsa, Basri Musmurati, sekretar i Partisë Demokratike të Kosovës (PDK), ka thënë se, kryeministri Hashim Thaçi dhe ministrat e tij në kabinetin qeveritar deri më tash nuk i kanë shfrytëzuar veturat e shtetit në fushatë zgjedhore , por sipas tij ndonjë qeveritar ose lokal ndoshta mund të keqpërdor, edhe pse ka rregullore që asnjëherë të mos dal në fushatë me veturat e shtetit,shkruan Bota Sot.
Kurse, Petrit Zogaj, drejtor ekzekutiv në Lëvizjen Fol, ka thënë se shfrytëzimi i veturave zyrtare për aktivitete partiake është në logjikë të njëjtë me shfrytëzimin që zyrtarët i bëjnë detyrës publike vazhdimisht.