Këshilli Gjyqësor i Kosovës (KGJK) në mbledhjen e 303-të të mbajtur të enjten, ka njoftuar se do t’i drejtohet Avokatit të Popullit për dërgimin e Ligjit të Pagave në Gjykatën Kushtetuese.
Këtë e bëri të ditur kryesuesi i KGJK-së, Albert Zogaj, i cili tha se Ligji i Pagave është në kundërshtim me standardet kushtetuese, raporton “Betimi për Drejtësi”.
“Ky Ligj është në kundërshtim me standardet kushtetuese, opinionet e Komisionit të Venecias dhe si i tillë cenon rëndë pavarësinë e gjyqësorit. E ftojmë Avokatin e Popullit që t’i ushtrojë funksionet e tij dhe ta procedojë këtë ligj të Gjykatën Kushtetuese”, tha Zogaj.
Këtë vendim për kërkesë tek Avokati i Popullit për dërgimin e Ligjit në Gjykatën Kushtetuese, kryesuesi Zogaj tha se e morën në mbledhjen e Asmblesë së kryetarëve të Gjykatave.
Ndryshe, Instituti i Kosovës për Drejtësi (IKD) më 6 janar 2023, ka deponuar tek Avokati i Popullit kërkesë për fillimin e hetimeve për shkelje të të drejtave të njeriut dhe inicim në Gjykatën Kushtetuese të Ligjit NR. 08/L-196 për Pagat në Sektorin Publik.