Përveç Lëvizjes Vetëvendosjes edhe partia tjetër opozitare Nisma për Kosovën, do ta kundërshtojë ratifikimin e demarkacionit me Malin e Zi.
Kjo parti është në pritje që mazhoranca e tanishme politike ta pranojë se kanë bërë gabim dhe ta shpallë këtë marrëveshje të pavlefshme në mënyrë që të hapet rruga dhe të fillohet një proces i ri për një marrëveshje të re.
Anëtari i Kryesisë së Nismës, Bilall Sherifi, ka thënë për Indeksonline se ratifikimi i kësaj marrëveshje do ta thellonte krizën politike në përmasa të një krize të sigurisë në vend.
“Do të bënin gabim të rëndë, sepse konsideroj që ratifikimi i kësaj marrëveshje krizën politike do ta thellonte në përmasa të një krize të sigurisë së vendit. Cilat do të jenë mënyrat e kundërshtimit do t’i bëjmë publike në kohën e duhur”, ka thënë Sherifi.
Sipas tij, demarkacioni sigurisht që do të bëhet, por jo ashtu siç është bërë me këtë marrëveshje. Ndërsa asnjë arsye nuk ekziston që vizat të ndërlidhen me demarkacionin.