E nisi me mësuesen, kaloi te nxënësi, pastaj u shpërnda te familjarët e nxënësve e për rrjedhojë gati në tërë fshatin. Virusi Parotit ka prekur shumë nxënës të shkollave në Komunën e Prizrenit.
Rreth 30 nxënës kanë kërkuar ndihmën e mjekut pasi janë prekur nga ky virus që në gjuhën e popullit njihet si “shytat”.
Një mësues i njërës nga shkollat ku është shfaqur virusi, tha për Tribunën se gjithçka ka filluar para disa muajve, kur është sëmurë një mësues.
Dyshohet se pastaj nga mësuesi, virusi është shpërndarë te nxënësit. “Në shkollën ‘Zef Lush Makur’ në fshatin Caprac, ishin tri raste të kësaj sëmundjeje. Të martën numri i rasteve ka arritur në 30 nxënës të infektuar dhe 1 arsimtar i infektuar rëndë”, thotë ky mësues, pa dashur t’i përmendet emri.
Mësuesi ka treguar se si Drejtoria e Arsimit në Komunën e Prizrenit ka kërkuar që kjo çështje mos të bëhet e madhe dhe rastet të trajtohen si të izoluara../Tribuna/