Gjykata Themelore në Prizren ua ka vazhduar masën e arrestit shtëpiak edhe për një muaj dy zyrtarëve të Gjykatës Themelore në Prishtinë, Deli Halili dhe Ismajl Ismajli, të cilët dyshohen për “Keqpërdorim të pozitës apo autoritetit zyrtar”.
Lajmin e ka bërë të ditur për “Betimi për Drejtësi”, zëdhënësi i Gjykatës Themelore në Prizren, Marcel Lekaj.
“Gjyqtarja e procedure paraprake, me datë 27.05.2024, ka marrë aktvendim, dhe ndaj të pandehurve, iu është vazhduar masa e arrestit shtëpiak, edhe për një (1) muaj e cila mund të zgjasë deri me datë 29.06.2024”, thuhet në përgjigjen e Lekajt, raporton “Betimi për Drejtësi”.
Ndryshe, Gjykata Themelore në Prizren më 5 prill 2024 ua ka vazhduar masën e paraburgimit edhe për një muaj dy të dyshuarve por Gjykata e Apelit kishte ndërruar këtë masë duke u caktuar masën e arrestit shtëpiak.
Çështja penale ndaj dy të dyshuarve është deleguar në kompetencë të Prokurorisë dhe Gjykatës Themelore në Prizren pasi që dy të dyshuarit janë punonjës të Gjykatës Themelore në Prishtinë e cila është shpallur jokompetente për të vijuar me rastin.
Halil dhe Ismajli ishin ndaluar nga Policia e Kosovës me 29 janar 2024 nën dyshimet për veprën penale “Keqpërdorimi i pozitës apo autoritetit zyrtar”, nga neni 414 i KPRK-së. /BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
Marketing
Kompleksi ‘Newco Elan’ ofron banesa të ëndrrave tuaja në zemër të Prizrenit
